जगरनाथपुर – नेपाल कम्युनिष्ट पार्टी एमालेबाट पर्साको निर्वाचन क्षेत्र नम्बर ४ का उम्मेदवार जालिम मियाँ यस अघि २०७४ मा जगरनाथपुर गाउँपालिकाको अध्यक्षमा निर्वाचित भएका थिए । संसदको टिकट ‘फिक्स’ भएपछि गत पुसमा जालिम एमाले प्रवेश गरेका थिए ।

गाउँपालिका अध्यक्ष हुँदा उनी माओवादी थिए । जगरनाथपुर गाउँपालिकाको अध्यक्ष हुँदा जालिमले कागजमा माटो पुरि सडक स्तरोन्नती देखाएर ४७ लाख ४८ हजार रुपैयाँ भ्रष्टचार गरेको पाइएको छ । 

आर्थिक वर्ष २०७७/७८ मा जगरनाथपुर गाउँपालिका वडा नम्बर ४ स्थित हुलाकी सडकको मन्साराम चोक देखि मोर गाउँ जाने सडकमा माटो पुरेर सडक स्तरोन्नतीका लागि ४७ लाख ४८ हजार रुपैयाँ विनियोजन गरिएको थियो । स्थानीयका अनुसार मोर हुलाकी सडकबाट मोर जाने कच्ची सडकमा एक छैटी माटो खसालिएको छैन् ।

सञ्चारकर्मीको टोली मोर सडकमा पुग्दा दुई दर्जन भन्दा बढी सर्वसाधारण सँग भेटेको थियो । एकजनाले पनि मोर सडकमा माटो खसाएको बताएनन् । उक्त बाटोमा पैदल हिड्न समेत समस्या रहेको स्थानीय ओमप्रकाश चौधरीले बताए ।

गाउँपालिका स्रोतका अनुसार जालिमले कागजमा माटो पुरेको देखाएर मात्र नभई ढलान नै नगरि समेत पैसा भुक्तानी गराएका छन् । स्रोतका अनुसार छात्राले प्रयोग गर्ने स्नेटरी प्याड समेत कागजमै खरिद देखाएर जालिमले आफू निकटका आपूर्तिकर्तालाई भुक्तानी दिलाएका छन् ।