वीरगञ्ज । पर्साको वीरगञ्जस्थित बहुअरी क्षेत्रमा भारतीय नम्बर प्लेटका मालवाहक सवारीसाधनलाई लक्षित गरी ट्राफिक प्रहरीले अनधिकृत रकम असुल्ने गरेको आरोप फेरि सार्वजनिक भएको छ। चालकहरूको गुनासोअनुसार एकीकृत जाँच चौकी (आईसीपी) अलौबाट भन्सार जाँचपास भएर निस्किएका गाडीलाई सुख्खा बन्दरगाह बहुअरी चौकको विचमा रहेको  ट्राफिक चेक प्वाइन्टमा रोकेर ‘ओभरलोड’लगायतका कारण देखाउँदै प्रतिगाडी ५ सयदेखि १ हजार रुपैयाँसम्म मागिने गरिएको छ।

स्थानीय तथा चालकबाट प्राप्त विवरणअनुसार रकम नदिए सवारी लामो समय रोक्ने, कागजात जाँचका नाममा दुःख दिने तथा गालीगलौज गर्ने गरिएको आरोप छ। बहुअरी ट्राफिक बिटका असई चित्रञ्जन साहको निर्देशनमा प्रहरी सहायक हवल्दार देवीलाल साहले रकम उठाउने गरेको आरोपसमेत लगाइएको छ। यी आरोपको स्वतन्त्र पुष्टि भने हुन बाँकी छ।

यस्तो गुनासो पछिल्लो पटक मात्र आएको देखिँदैन। विगतका दिनहरुमा समेत परवानीपुर, ड्राइपोर्ट र गण्डक क्षेत्रमा भारतीय मालवाहक सवारीका चालकबाट भारतीय रुपैयाँ २ सयदेखि ५ सयसम्म रकम मागिएको चालकहरूले आरोप लगाएका थिए। 

त्यसैगरी पछिल्ला केही महिनामा प्रकाशित समाचारहरूमा पनि बहुअरी, ड्राइपोर्ट र परवानीपुर क्षेत्रमा ओभरलोड मालवाहक सवारीलाई कारबाही नगरी रकम लिएर छाड्ने गरेको आरोप दोहोरिएको छ। पछिल्लो दिनमा  समेत बहुअरी बिटमै भारतीय गाडीबाट ५ सयदेखि १ हजार रुपैयाँसम्म असुली भइरहेको चालक तथा स्थानीयको दाबी  गरेका छन्।

यसले बहुअरी क्षेत्रमा उठेको पछिल्लो आरोपलाई एकल घटनाभन्दा लामो समयदेखि दोहोरिँदै आएको गुनासोको रूपमा हेर्नुपर्ने अवस्था देखाएको छ।

जिल्ला ट्राफिक प्रहरी कार्यालय पर्साले त्यस्तो गलत गतिविधि भएको प्रमाणित भए संलग्न जोकोहीलाई विभागीय कारबाही गरिने बताएको छ। प्रहरीले रकम असुली नगरेको दाबी गरे पनि चालक तथा स्थानीयबाट लगातार यस्ता गुनासो आउन थालेपछि सम्बन्धीत निकायले बहुअरी ट्राफिक बिटको गतिविधि, सीसीटीभी फुटेज, ड्युटी विवरण र सवारी जाँचको अभिलेख जाँच गर्नुपर्ने देखिन्छ।

यदि ओभरलोड वा अन्य ट्राफिक नियम उल्लङ्घन भएको हो भने जरिवाना तथा कारबाहीको आधिकारिक अभिलेख कहाँ छ? र चालकबाट नगद रकम लिइएको हो भने त्यसको रसिद वा राजस्व अभिलेख किन छैन ? भन्ने प्रश्न महत्वपूर्ण हुन्छ।

त्यसैले बहुअरी बिटमा पछिल्ला केही साताको सीसीटीभी फुटेज, ड्युटीमा खटिएका प्रहरीको विवरण, जाँच गरिएका भारतीय नम्बरका गाडीको अभिलेख, काटिएका जरिवाना रसिद र बिटमा भएको गतिविधि जाँच गरिए आरोपको वास्तविकता छुट्याउन सकिने देखिन्छ।

नेपाल ट्राफिक प्रहरीले उजुरी तथा गुनासोका लागि आधिकारिक अनलाइन माध्यम उपलब्ध गराएको छ र ट्राफिक कन्ट्रोल नम्बर १०३ रहेको जनाएको छ। भ्रष्टाचारसम्बन्धी प्रमाण वा सूचना भए अख्तियार दुरुपयोग अनुसन्धान आयोगले पनि अनलाइन उजुरी लिन सक्ने व्यवस्था गरेको छ।