वीरगञ्ज । वीरगञ्ज महानगरपालिकाका वडा नम्बर ३०, ३१ र ३२ का नागरिक अगुवा समाजको आयोजनामा दशैँ, नेपाल संवत्, दीपावली तथा छठ पर्वको अवसरमा शुभकामना आदानप्रदान कार्यक्रम सम्पन्न भएको छ। कार्यक्रममा वीरगञ्ज महानगरपालिकाको मेयर पदका प्रत्याशी तथा राष्ट्रिय स्वतन्त्र पार्टी (रास्वपा) का महाधिवेशन प्रतिनिधि सुधीर पटेलले आगामी स्थानीय तहको निर्वाचनमा जेनजी आन्दोलनका अगुवालाई नै मेयरको उम्मेदवार बनाउनुपर्ने माग गरेका छन्।

वडा नम्बर ३१ स्थित सोलखपुर फिल्डमा युवा समाजसेवी तथा वडा नम्बर ३१ का पूर्ववडाध्यक्ष चुमन दास चौधरीको अध्यक्षतामा सम्पन्न कार्यक्रममा प्रमुख अतिथिका रूपमा सहभागी पटेलले जेनजी आन्दोलनले उठाएको परिवर्तनको भावनाअनुसार पार्टीले उम्मेदवार छनोट गर्नुपर्ने बताए।

पटेलले रास्वपाका केही नेताहरूले नेकपा एमालेबाट आएका नेताहरूलाई पार्टीमा प्रवेश गराएको विषयप्रति असन्तुष्टि व्यक्त गर्दै आगामी निर्वाचनमा अन्य पार्टीबाट आएका नेतालाई वीरगञ्ज महानगरपालिकाको मेयरको उम्मेदवार बनाइए आफू चुप लागेर नबस्ने चेतावनी दिए। उनले पार्टी नेतृत्वले उम्मेदवार छनोट गर्दा जनताको भावना र परिवर्तनको चाहनालाई बेवास्ता गर्न नहुने धारणा राखे।

जेनजी आन्दोलनको भावनाअनुसार उम्मेदवार छनोट गर्नुपर्ने

पटेलले जेनजी आन्दोलन परिवर्तनको पक्षमा उठेको आवाज भएको उल्लेख गर्दै आन्दोलनका अगुवालाई नै नेतृत्वमा पुर्‍याउनुपर्नेमा जोड दिए। जेनजी अगुवासमेत रहेका पटेलले रास्वपा नेतृत्वसमक्ष आगामी स्थानीय तहको निर्वाचनमा वीरगञ्ज महानगरपालिकाको मेयरको उम्मेदवार जेनजी आन्दोलनका अगुवामध्येबाट छनोट गर्न माग गरेका हुन्।

उनले पार्टीले अन्य राजनीतिक दलबाट आएका नेतालाई उम्मेदवार बनाउने निर्णय गरे त्यसको जनस्तरबाट समेत विरोध हुन सक्ने बताए। साथै उनले प्रधानमन्त्री बालेन शाह र रास्वपा सभापति रवि लामिछानेको काम तथा कर्तव्यप्रति आफू पूर्ण विश्वस्त रहेको पनि उल्लेख गरे।

कार्यक्रममा पटेलले उपस्थित स्थानीयवासीलाई दशैँ, नेपाल संवत्, दीपावली तथा छठ पर्वको शुभकामना व्यक्त गर्दै आगामी स्थानीय तहको निर्वाचनमा आफूलाई सहयोग गर्न आग्रह गरेका थिए।

स्थानीयवासीको उल्लेख्य सहभागिता

कार्यक्रममा जेनजी पर्साका प्रमुख सल्लाहकार वीरेन्द्र कण्ठसहित विभिन्न वडाबाट आएका अतिथिहरू घनश्याम चौधरी, गणेश चौधरी, केदार पटेल, रामदरस पण्डित, जयराम महतो, अब्दुल सयद अन्सारी, अजय पटेल, गम्भीरा शाह कलवार र प्रमिला चौधरीलगायतले शुभकामना मन्तव्य व्यक्त गरेका थिए।

उनीहरूले आगामी स्थानीय तहको निर्वाचनमा सुधीर पटेललाई सहयोग गर्ने प्रतिबद्धतासमेत व्यक्त गरेका थिए।

वडा नम्बर ३०, ३१ र ३२ का नागरिक अगुवा समाजको आयोजनामा सम्पन्न कार्यक्रममा तीनवटै वडाका हजारौँ स्थानीयवासीको उपस्थिति रहेको आयोजकले जनाएको छ।

कार्यक्रमको सहजीकरण जेनजी पर्साका संयोजक महादेव प्रसाद कुर्मीले गरेका थिए भने कार्यक्रमको समापन अध्यक्ष चुमन दास चौधरीले गरेका थिए।