वीरगञ्ज । वीरगञ्ज महानगरपालिका अन्तर्गतको भोजपुरी प्रतिष्ठान, वीरगञ्जको आयोजनामा सञ्चालित ‘आपन भाषा आपन पहिचान’ अभियान अन्तर्गत दोस्रो साप्ताहिक कार्यक्रम वीरगञ्ज चिनीमिलस्थित सिद्धार्थ माध्यमिक विद्यालयमा सम्पन्न भएको छ ।
    प्रतिष्ठानका सदस्य सचिव अमित अग्रवालको अध्यक्षतामा सम्पन्न कार्यक्रममा प्रमुख अतिथि सल्लाहकार प्रमोद पाण्डे, अतिथि अस्मिता पटेल तथा विशिष्ट अतिथिका रूपमा शिक्षक सन्नी दुवे र शिक्षिका सिता अधिकारीको उपस्थिति थियो ।
    कार्यक्रममा अमोद गुप्ता र अस्मिता पटेलले भाषा र साहित्यसम्बन्धी मन्तव्य राख्दै आफ्ना रचनाहरू प्रस्तुत गरेका थिए ।
    प्रमोद पाण्डेले भाषा र बोलीको अन्तर प्रस्ट्याउँदै मातृभाषाको मानवीकरण र मानकीकरण अपरिहार्य रहेको बताए। उनले भोजपुरी भाषाले विश्वभर सांस्कृतिक छाप छोडिरहेको उल्लेख गर्दै यसको संरक्षण, प्रवद्र्धन र प्रयोगमा सबै लाग्नुपर्नेमा जोड दिए ।
    यसअघि गत शुक्रबार आयोजित कार्यक्रमबाट प्रेरित हुँदै यसपटक विद्यार्थीहरूमा झन् उत्साह देखिएको थियो। उनीहरूले खुलेरै आफ्नो मातृभाषामा गीत प्रस्तुत गरेका थिए। कक्षा ९ मा अध्ययनरत छात्रा मनिषा कुमारी पण्डितले छठ पूजा तथा विवाहमा गाइने पारम्परिक भोजपुरी लोक गीतहरू गायन गरेर माहोल भावनात्मक बनाएकी थिइन् ।
    कार्यक्रममा श्याम सर्राफले भोजपुरी गीतहरूको सांस्कृतिक महत्वबारे चर्चा गर्दै परम्परा, संस्कार र समाजमा लोक गीतले खेल्ने भूमिकाबारे उल्लेख गरे। उनले विभिन्न अवसरमा गाइने भिन्न भिन्न गीतहरू प्रस्तुत गरेर उपस्थितहरूलाई मन्त्रमुग्ध पारे।
    कार्यक्रमको सञ्चालन माधुरी महतोले गरेकी थिइन् भने मुकेश महतोको उपस्थिति रहेको थियो ।
    भोजपुरी प्रतिष्ठान, वीरगञ्जका सदस्यहरूले वीरगञ्ज महानगर प्रमुख राजेशमान सिंहको परिकल्पना अनुसार बालबालिकाहरूमा आफ्नो भाषा, साहित्य, कला, संस्कार र संस्कृतिप्रति रुचि, गर्व र आत्मीयता जगाउने उद्देश्यले महानगरका विभिन्न विद्यालयमा अभियान सञ्चालन गरिएको जानकारी दिएका छन् ।
    उनीहरूले भाषा मात्र सञ्चारको माध्यम नभई सांस्कृतिक पहिचानको आधार भएको उल्लेख गर्दै मातृभाषामार्फत सिर्जना, अभिव्यक्ति र संस्कारको निरन्तरता सहज हुने बताए। कार्यक्रमले बालबालिकामा आफ्ना मौलिक संस्कार र सांस्कृतिक सम्पदा प्रति थप आकर्षण जगाएको प्रतिक्रिया प्राप्त भएको छ ।