पर्सा । राजनीतिमा परिवर्तनको खोजी जब युवाहरूबाट सुरु हुन्छ, तब आशा र सम्भावनाको नयाँ अध्याय खुल्छ । पर्सा जिल्लामा यस्तै एक प्रेरणादायी नाम हुन् — सुधीर पटेल । निर्वाचनमा पराजित भए पनि जनताको मन जित्न सफल यी युवा नेता आज पर्सा मात्र होइन, प्रदेशस्तरमै युवाको आवाज बन्न थालेका छन् ।

२०७९ सालको प्रदेशसभा निर्वाचनमा पर्सा क्षेत्र नं. १ ‘क’ बाट प्रदेशसभा सदस्यको स्वतन्त्र उम्मेदवारी दिएका पटेलले भोटमार्फत हैन, व्यवहारमार्फत जनताको मन जित्ने यात्रामा आफूलाई समर्पित गरेका छन् । निर्वाचन परिणामले उनले अघि बढेको बाटो रोकेन, उल्टै उनले ‘हार’लाई ‘सकारात्मक ऊर्जा’मा रूपान्तरण गरे ।

सुधीर पटेल भन्छन्, “राजनीति मेरो लागि शक्ति प्रदर्शन होइन, सेवा गर्ने माध्यम हो ।” यही सोचले गर्दा उनी जनताको मनमा विश्वासिलो छवि बनाउन सफल भएका छन् । उनले युवाहरूलाई राजनीति र सामाजिक सेवा तर्फ आकर्षित गर्न प्रेरणादायी भूमिका खेलिरहेका छन् ।

उनले पछिल्लो समय गाउँ–टोलका विकास परियोजनामा सरोकारवाला निकायसँग समन्वय गर्दै जनचेतनामूलक कार्यक्रम, युवा सशक्तिकरण, शिक्षा प्रवद्र्धन र सामाजिक न्यायका विषयमा खुलेर बोल्दै आएका छन् ।

स्थानीय युवाहरू भन्छन्, “सुधीर दाइ हामीजस्तै सोच्नुहुन्छ, हामीजस्तै बोल्नुहुन्छ । उहाँजस्ता नेताहरू हामीलाई राजनीति र परिवर्तनप्रति आस्था दिलाउँछन् ।” सहज, मृदु भाषी र सरल स्वभावका कारण सुधीर पटेल गाउँ–शहरका सबै वर्गमा लोकप्रिय छन् ।

बिशेषतः उनले कुनै पदमा नभए पनि आमनागरिकका समस्या सुनिदिने, समाधान खोजिदिने व्यवहारले गर्दा उनमा ‘नेतृत्वको गुण’ स्वाभाविक रूपमा देखिएको छ ।

सुधीर पटेल जस्ता युवाको सक्रियता राजनीतिक शुद्धीकरण र नव निर्माणको संकेत हो । सधैं संघर्षको बाटो हिँड्ने उनले सानो पदको लोभ होइन, दीर्घकालीन प्रभाव र जनसेवामा विश्वास राख्ने बताउँछन् । उनी भन्छन्, “राजनीति जित्नु होइन, जनताको मन जित्नु मुख्य कुरा हो ।”

उनको योजनाबद्ध कार्यशैली, अनुशासन, समाजप्रतिको जिम्मेवारी र सकारात्मक दृष्टिकोणले उनी निकट भविष्यमा पर्सा जिल्लाको नेतृत्वमा नयाँ सन्देश दिन सक्ने संकेत देखिन्छ ।

जब राजनीति पुरानो अनुहारमा थलिएको थियो, त्यहीबेला सुधीर पटेलजस्ता युवा नेतृत्वले नयाँ आशा बोकेर पर्सामा पाइला टेके । आज उनी पदमा नरहे पनि प्रभावमा छन्, चुनावमा हारे पनि जनताको माया जितेका छन् । पर्साका जनताले अब उनीभित्र भावी नेतृत्वको सम्भावना देख्न थालेका छन् । उनी अब राजनीतिक विकल्प मात्र होइन, विश्वासको नयाँ नाम बन्न थालेका छन् ।