नारायणी अस्पतालको नर्स आवास क्वार्टरमा गैरनर्सको अवैध कब्जा

डेढ दशकदेखि समाधानविहीन

सम्वादाता | २०८२ सावन १६ गते ०१: ०२ मा प्रकाशित
वीरगञ्ज, १५ साउन — नारायणी अस्पताल, वीरगञ्जमा नर्सहरूको लागि निर्माण गरिएको आवास क्वार्टरमा डेढ दशकदेखि गैरनर्सहरूको अवैध कब्जा कायम रहेको पाइएको छ । अस्पताल प्रशासनका अनुसार ३२ कोठे उक्त क्वार्टरमध्ये करिब ४० प्रतिशत कोठामा नर्सबाहेकका कर्मचारी तथा बाह्य व्यक्तिहरू बसेका छन् ।
महेन्द्र आरोग्य भवनको पश्चिमतर्फ रहेको क्वार्टर नर्सहरूका लागि भनेर निर्माण गरिएको हो । तर, निर्माणपछि नै अस्पतालका तत्कालीन कर्मचारी, जनस्वास्थ्य कार्यालयका कर्मचारी तथा अन्य निकायबाट आएका व्यक्तिहरूले कोठा कब्जा गरी बसेका छन् । सरुवा भई गएपछि पनि कोठा खाली नगरी आफन्तलाई जिम्मा लगाउने, तालाबन्दी गर्ने वा अरूलाई बस्न दिने जस्ता कार्य भइरहेको छ ।
नर्सका लागि बनाइएको आवासमा गैरनर्सहरूको कब्जाले गर्दा बाहिरबाट आएका नयाँ नर्सहरू अस्पतालको क्वार्टर नपाई डेरामा बस्न बाध्य छन् । यसकै असरस्वरूप अस्पतालमा दक्ष जनशक्ति टिक्न सकिरहेको छैन ।
अस्पताल विकास समितिका अध्यक्ष धीरज गुप्ताका अनुसार अवैध बसोबास हटाउने प्रयास बारम्बार भए पनि राजनीतिक हस्तक्षेपले अभियान अघि बढ्न सकेको छैन । “क्वार्टर खाली गराउने प्रक्रिया थाल्नासाथ राजनीतिक दबाब आउँछ, जसले गर्दा हरेकपटक अभियान रोकिन्छ,” उनले बताए ।
अस्पतालका हालका मेडिकल सुपरिटेन्डेन्ट डा. चुमनलाल दास पनि क्वार्टर नपाएर एक महिनासम्म होटलमा बस्नुपरेको उदाहरण छ । यस्तै, अस्पतालको ११ तहकी मेट्रोन समेत अहिलेसम्म डेरामै बसिरहेकी छन् ।
अस्पताल प्रशासनका प्रमुख ह्दयेश गिरीका अनुसार हाल नयाँ रणनीति अवलम्बन गरिएको छ । अब क्वार्टरबाट बाहिरिनेहरूलाई साँचो बुझाएको प्रमाण बिना रवानापत्र नदिइने व्यवस्था गरिएको छ । उक्त नियम लागू गरेपछि हालसम्म एकजनाले मात्र क्वार्टर खाली गरेको उनले जानकारी दिए ।
तर, सेवानिवृत्त, घर भएका वा अन्यत्र सेवा गर्ने व्यक्तिहरूको हकमा भने अस्पताल प्रशासन मौन देखिएको छ । स्थानीय प्रहरी प्रशासनले अवैध कब्जा हटाउन सहयोग गर्ने आश्वासन दिँदै आएको भए पनि अस्पताल प्रशासनले हालसम्म त्यसको औपचारिक पहल गरेको छैन ।
यसैबीच, अस्पताल परिसरकै प्रसूति गृहको पूर्वतर्फ रहेको २४ कोठे आवास भवनमा पनि त्यस्तै अवस्था रहेको देखिएको छ । अधिकांश कोठामा गैरचिकित्सक तथा गैरस्वास्थ्यकर्मीहरूको बसोबास रहेको स्रोत बताउँछ ।
निजी सम्पत्तिको जस्तो व्यवहार हुँदै आएको अस्पतालको आवास व्यवस्थापनमा सुधार ल्याउन अब गम्भीर राजनीतिक इच्छाशक्ति र प्रशासनिक कडाइ आवश्यक देखिएको छ । नत्र भने, नारायणी अस्पतालमा सेवा प्रवाहसँगै दक्ष जनशक्ति अभाव झन् जटिल बन्दै जाने जोखिम बढेको छ ।

 

प्रतिक्रिया दिनुहोस्

सम्बन्धित समाचार

वीरगञ्जमा वृहत वृक्षारोपण कार्यक्रम सम्पन्न, हरियाली विस्तारमा समुदायको सक्रियता

नारायणी अस्पतालको नर्स आवास क्वार्टरमा गैरनर्सको अवैध कब्जा

प्रगतिनगरमा दुर्गा पूजा व्यवस्थापन समिति गठन

मोदीले प्रधानमन्त्री पदबाट राजीनामा दिन सक्ने

भारतका प्रधानमन्त्री नरेन्द्र मोदीले आफ्नो पदबाट राजीनामा दिन सक्ने चर्चाले अहिले सिंगो भारतसहित दक्षिण एसियामै तरंग सिर्जना गरेको छ ।

पर्साका अधिकांश पालिकामा आन्तरिक आम्दानी न्यून

भर्खरै अख्तियार दुरुपयोग अनुसन्धान आयोगको छापापछि २७८ कर्मचारीको नामावली पठाइएको छ ।

सुक्खा मधेश : खाद्य सुरक्षा जोखिममा

मधेश प्रदेशको कृषि बाली प्रायः आकाशे पानीमा निर्भर रहेको तथा यस वर्ष कम वर्षा भएकाले कृषि बालीले ओगटेको क्षेत्रफलमा कमी आएको अनुमान रहेको प्रतिवेदनमा उल्लेख छ ।
ट्रेन्डिङ

बजार