महानगरको सवारी–कबाडी कर ठेक्कामा उल्लेख्य वृद्धि

भदौ १ देखि नयाँ दरमा असुली सुरु हुने

सम्वादाता | २०८२ सावन १८ गते ०१: ३३ मा प्रकाशित
प्रकाश तिवारी
वीरगञ्ज । वीरगञ्ज महानगरपालिकाको सवारी कर तथा कबाडी कर ठेक्कामा यो वर्ष उल्लेख्य वृद्धि भएको छ । चालु आर्थिक वर्ष २०८२-८३ का लागि खोलिएको ठेक्का प्रक्रियामा प्रतिस्पर्धात्मक दर प्रस्ताव आएपछि दुईवटै कर शीर्षकको ठेक्का अघिल्ला वर्षको तुलनामा उच्च दरमा पक्की भएको हो ।
राजस्व महाशाखाका प्रमुख मनोज कर्णका अनुसार, सवारी कर ठेक्का प्रभु कन्सट्रक्सनले सात करोड ६१ लाख रुपैयाँ (भ्याटबाहेक) मा हात पारेको छ । भ्याटसहित यो रकम आठ करोड ६१ लाख पुग्नेछ । अघिल्लो आव ०८१-८२ मा सोही ठेक्का छ करोड ७१ लाख मा पाइएको थियो भने त्यस अघिको वर्षमा तीन करोड तीन लाख मात्र थियो ।
त्यस्तै, कबाडी कर ठेक्का अमित ठेक्कापट्टाले चार करोड ८८ लाख (भ्याटबाहेक) मा लिएको छ । भ्याटसहित यो रकम पाँच करोड ५१ लाख पुग्ने जनाइएको छ । अघिल्लो वर्ष यो ठेक्का चार करोड ३० लाख र त्यस अघिको वर्ष तीन करोड छ लाख मा पाइएको थियो ।
यसअघि असारमा निकालिएको टेन्डरमा ठेकेदारबीच मिलेमतो भएको आशंका भएपछि नगरप्रमुख राजेशमान सिंहले टेन्डर रद्द गर्न निर्देशन दिएका थिए । सो टेन्डरमा ठेकेदारहरूले नगरले तोकेको न्यूनतम रकममा सामूहिक रुपमा कम मात्र प्रस्ताव दिएको पाइएको थियो ।
महानगरले यसपटक भ्याटसहित ठेक्का सम्झौता गरेको छ । अघिल्लो वर्षसम्म भ्याटबाहेक रकममा ठेक्का दिइँदै आएको थियो ।
महानगरका अनुसार हालसम्म पुराना ठेकेदारहरूले साउन मसान्तसम्म पुरानै दररेट मा कर असुली गर्दै आएका छन् भने भदौ १ गतेदेखि नयाँ ठेकेदारले नयाँ दररेट अनुसार कर संकलन गर्ने छन् ।
सवारी कर तथा कबाडी कर ठेक्का विगतदेखि नै विवादित रहँदै आएको छ । ठेकेदारहरूद्वारा मापदण्डविपरीत कर असुली, सेवाग्राहीमाथि दबाब तथा मनोमानी व्यवहारका कारण विरोध र आलोचना हुँदै आएको छ ।
महानगरले भने यसपटक ठेक्का प्रक्रिया पारदर्शी ढंगले सम्पन्न भएको दाबी गर्दै कर संकलन कार्यमा निगरानी तथा अनुगमन कडाइका साथ अघि बढाइने जनाएको छ ।

 

प्रतिक्रिया दिनुहोस्

सम्बन्धित समाचार

महानगरको सवारी–कबाडी कर ठेक्कामा उल्लेख्य वृद्धि

सवारी कर तथा कबाडी कर ठेक्का विगतदेखि नै विवादित रहँदै आएको छ । ठेकेदारहरूद्वारा मापदण्डविपरीत कर असुली, सेवाग्राहीमाथि दबाब तथा मनोमानी व्यवहारका कारण विरोध र आलोचना हुँदै आएको छ ।

उपत्यकामा आपराधिक क्रियाकलापविरुद्धको ‘अपरेशन’ नरोकिने

स्व. सुबोध स्मृति पत्रकारिता पुरस्कार : तीनजना पत्रकार सम्मानित हुने

नेशनल मेडिकल कलेज र हुलास बीच स्वास्थ्य सम्झौता

वीरगञ्जमा वृहत वृक्षारोपण कार्यक्रम सम्पन्न, हरियाली विस्तारमा समुदायको सक्रियता

नारायणी अस्पतालको नर्स आवास क्वार्टरमा गैरनर्सको अवैध कब्जा

अस्पताल परिसरकै प्रसूति गृहको पूर्वतर्फ रहेको २४ कोठे आवास भवनमा पनि त्यस्तै अवस्था रहेको देखिएको छ । अधिकांश कोठामा गैरचिकित्सक तथा गैरस्वास्थ्यकर्मीहरूको बसोबास रहेको स्रोत बताउँछ ।
ट्रेन्डिङ

बजार