वीरगञ्ज :  पर्सास्थित वीरगञ्जको प्रतिष्ठाको प्रतीक मानिने घण्टाघर सात महिनापछि मर्मतसम्भार सम्पन्न भएको छ। गत फागुन ७ गते घण्टाघरको ‘बाल्कोनी’ भाग कमजोर भएर इँटा झरेपछि आंशिक संरचना भत्किएको थियो।

वीरगञ्ज महानगरपालिकाले भत्किएको संरचना मर्मतसम्भार र रङरोगन गरी घण्टाघरलाई पुनः पहिलाकै अवस्थामा ल्याएको छ। भूमि व्यवस्था तथा सहरी विकास महाशाखा प्रमुख प्रभात झाका अनुसार घण्टाघरलाई ऐतिहासिक धरोहरको रूपमा सुरक्षित राख्न मेसिन प्रयोग नगरी म्यानुअल ढङ्गले मर्मत गरिएको हो।

“अहिले घण्टाघरको लगभग सबै संरचना निर्माणको काम सकिएको छ,” प्रमुख झाले भन्नुभयो, “मर्मतपछि कम्तीमा १० वर्षसम्म यो टिकाउ हुने अपेक्षा गरेका छौँ।”

उहाँका अनुसार वरपर सवारीसाधन र यात्रुको चाप हुने भएकाले सुरक्षाका लागि स्काफोल्डिङ र कन्ट्रक्सन जाली लगाएर काम गरिएको थियो। हाल ती जाली र स्काफोल्डिङ हटाइएका छन्।

घण्टाघर मर्मतको लागत करिब २० लाख रुपैयाँभन्दा कममा सीमित हुने अनुमान गरिएको छ। ठेक्का महाशक्ति कन्स्ट्रक्सनले पाएको थियो।

घण्टाघरको बाल्कोनीमा आकाशे पानीको उचित निकास नहुँदा घामपानीको असरले संरचना बिग्रिएको बताइएको छ। “माथिल्लो बाल्कोनीमा पुगेर काम गर्नुपर्ने भएकाले समय बढी लागेको हो,” प्रमुख झाले स्पष्ट पार्नुभयो।

सन् १९७९ फेब्रुअरी ८ मा तयार भएको वीरगञ्जको यो घण्टाघर जापानको योनागो सहरका विद्यार्थीले एक दिनको खाजाको पैसा बचत गरी सहयोग गरेको धनराशिबाट निर्माण गरिएको स्थानीय ज्येष्ठ नागरिकहरूको भनाइ छ। आजसम्म स्वदेशी तथा विदेशी पर्यटकका लागि घण्टाघर प्रमुख आकर्षणको रूपमा रहँदै आएको छ।