वीरगञ्ज । बडादशैंको अवसरमा वीरगञ्ज भन्सार कार्यालय परिसरभित्र तैनाथ सशस्त्र प्रहरीको बीओपी प्रमुख तथा उनका घुमुवाहरुले व्यापारीमाझ आतंक मचाइरहेको आरोप व्यापारीहरुले लगाएका छन् ।

प्राप्त जानकारीअनुसार वीरगञ्जका विभिन्न व्यापारीहरुको गोदाम, पसल तथा भण्डारण गरिएको मालसामान भन्सार चेकजाँच गर्ने बहानामा रकमको बार्गेनिङ गर्ने र कुरा नमिलेमा सामान जफत गरी भन्सार बुझाउने कार्य भइरहेको छ । यसै क्रममा एक घुमुवालाई व्यापारीहरुले लखेट्नुपरेको घटनासमेत बाहिर आएको छ ।

केही दिनअघि त्यही घुमुवाले आफू भन्सारका डिएसपीको मान्छे भएको भन्दै जेन–जी आन्दोलनकै क्रममा गोदाममा राखिएको सामान भन्सार बिलबिजकसहित लैजाँदै गर्दा बिल अपूरो भएको निहुँमा भन्सार बुझाउने धम्की दिएका थिए । पछि बार्गेनिङ असफल भएपछि सामानसहितको गाडी नै भन्सार बुझाइएको व्यापारीहरुले बताएका छन् ।

व्यापारीहरुले आफ्नो कागजात दुरुस्त रहेको र अनावश्यक रकम दिन नसक्ने बताएका थिए । यसबारे व्यापारी स्वयंले डिएसपीको नाममा घुमुवाले बिच बाटोमा झमेला गरिरहेको जानकारी भन्सार स्थित सशस्त्र बिओपी प्रमुखलाई दिए । जानकारी पाएपछि डिएसपी पुरुषोत्तम भण्डारी आफैं घटनास्थल पुगे । तर उनले कागजात तत्काल हेर्न नमिल्ने भन्दै सामान भन्सार लगेका थिए ।

सामान भन्सारमा लगिसकेपछि व्यापारी सम्पूर्ण कागजातसहित बीओपी कार्यालय पुगे तर भण्डारीले आफू बाहिर भएको भन्दै चेकजाँच पर्खन आग्रह गरे । तर साँझपख उनी कार्यालयमै रहेर सामानलाई अवैध ठहर गर्दै भन्सार बुझाएको व्यापारीहरुको आरोप छ । यसरी आफ्नो मालसामान छुटाउन गएका व्यापारी निराश भई फर्किनुपरेको उनीहरुले बताएका छन् ।

सञ्चारकर्मीले जब जफत गरिएको सामानबारे जानकारी मागे, डिएसपी भण्डारीले आफु बाहिर रहेको र भन्सार पुगेपछि मालसामान चेकजांच गरि बताउने भने । त्यतीखेर उनि भन्सार परिसरमै थिए । पछि उनले आफ्नो मोबाइल फोन स्विच अफ गरेका थिए । के कति माल पक्राउ गरियो ? के कति भन्सार बुझाइयो ? पक्राउ परेको मालसामानको मुल्यांकन के ? सञ्चारकर्मीलाई सूचना दिइएन ।

डिएसपी भण्डारीले रक्सौलबाट दशैं–तिहारको किनमेल गरेर ल्याइरहेका सर्वसाधारण नागरिकका दैनिक उपभोग्य सामान बाटोबाटै खोस्न खोज्दा स्थानीयको आक्रोशको सामना गर्नुपरेको घटना सार्वजनिक भएको थियो ।

वीरगञ्ज भन्सार परिसरमा देखिएको प्रहरी घुमुवाको यस्तो गतिविधि केवल व्यापारीविरुद्धको दुराचार मात्र होइन, यो राज्य संयन्त्रकै चरित्रमाथिको गम्भीर प्रश्न हो । सुरक्षाबल नागरिकको सुरक्षाका लागि तैनाथ हुन्छन्, तर सुरक्षाकर्मी आफैंले गैरकानुनी बार्गेनिङ र धम्की दिने काम गर्दा कानुनको शासन कमजोर मात्र हुँदैन, नागरिकको विश्वास पनि गुम्छ ।

जेन–जी आन्दोलनले मुलुकभर राज्य संयन्त्रप्रति असन्तोष उजागर गरिसकेको छ । त्यस्तो अवस्थामा सुरक्षाबलले अनुशासन पालना गर्नुपर्ने जिम्मेवारी झनै बढ्छ । तर उल्टै सशस्त्रकै हातबाट व्यापारीलाई कागजात भएर पनि त्रासमा राखिनुले आन्दोलनको मागलाई अझै सशक्त बनाउन सक्छ ।

कानुनले यस्ता गैरकानुनी कार्यमा संलग्न अधिकारीलाई सजाय दिने प्रावधान राखेको छ । तर यस्ता घटनामा कारबाही नहुनु वा ढिलो–सुस्ती हुनुले प्रहरी संगठनभित्रको दण्डहीनता झल्काउँछ । यदि तत्काल छानबिन र कारबाही भएन भने यसले सशस्त्र प्रहरी संगठनको छविमा आघात पार्नेछ ।

नागरिकले दशैं–तिहारजस्ता पर्वमा न त किनमेल सहज रूपमा गर्न पाउने अवस्था छ, न त सुरक्षाकर्मीमाथि विश्वास गर्न सक्ने स्थिति । यस्तो प्रवृत्तिले समाजमा असन्तोष बढाउने, कानूनप्रति अविश्वास जन्माउने र आन्दोलनलाई थप उक्साउने सम्भावना देखिन्छ ।

त्यसैले, प्रहरी संगठनले यस्ता घटनालाई गम्भीरतापूर्वक लिएर निष्पक्ष छानबिन र दोषीमाथि कडा कारबाही गर्न आवश्यक छ । सुरक्षाबल स्वयं नै आतंकको पर्याय बन्ने अवस्था लोकतन्त्र र नागरिक अधिकारका लागि दीर्घकालीन खतरा हो ।