वीरगंज । नेकपा एमाले पर्सा निर्वाचन क्षेत्र नं. २ की उम्मेदवार रिमा कुमारी यादवले वीरगञ्ज महानगरपालिका वडा नम्बर–२८ ईनरवा तथा बगही क्षेत्रमा सोमबार घरदैलो कार्यक्रम तथा वडा स्तरीय अगुवा भेला सम्पन्न गरेकी छन्।

घरदैलो कार्यक्रमका क्रममा उम्मेदवार यादवले स्थानीय बासिन्दासँग प्रत्यक्ष भेटघाट गर्दै शिक्षा, स्वास्थ्य, कृषि, सडक तथा सामाजिक विकाससँग सम्बन्धित समस्या सुन्दै समाधानका लागि पहल गर्ने प्रतिबद्धता व्यक्त गरिन्। यसअघि निर्वाचित जनप्रतिनिधिहरूबाट अपेक्षित विकास हुन नसकेको उल्लेख गर्दै त्यसकै कारण आफू राजनीतिमा होमिएको उनले बताइन्।

वीरगञ्ज–२८ बगहीमा आयोजित अगुवा भेलालाई सम्बोधन गर्दै यादवले शिक्षा, स्वास्थ्य र कृषि क्षेत्रको विकास बिना समृद्ध समाज निर्माण सम्भव नहुने बताइन्। उनले वडा–वडामा सीपमूलक तालिम सञ्चालन गरी महिलालाई आत्मनिर्भर बनाउने र रोजगारीसँग जोड्ने लक्ष्य रहेको उल्लेख गरिन्।

यादवले प्रत्येक स्वास्थ्य संस्थामा सुलभ औषधि उपलब्ध गराउने, चिकित्सक नियुक्तिका लागि पहल गर्ने तथा स्वास्थ्य चौकीहरूमा कम्तीमा एक जना एमबिबिएस डाक्टरसहितको सेवा सुनिश्चित गर्न आफूले पहल गर्ने स्पष्ट पारिन्। साथै उनले प्रौढ शिक्षालाई पुनः सञ्चालन गर्नुपर्ने आवश्यकता औंल्याउँदै यसले महिलाको सशक्तीकरणमा महत्वपूर्ण भूमिका खेल्ने बताइन्।

घरदैलो तथा भेलामा महिलाहरूको सक्रिय सहभागितालाई सकारात्मक संकेतका रूपमा उल्लेख गर्दै यादवले महिलालाई राजनीतिमा अगाडि ल्याउने र समुदायमा सशक्त बनाउने आफ्नो प्रतिबद्धता दोहोर्याइन्। उनले सूर्य चिन्हमा मतदान गरी विकास र समावेशी प्रतिनिधित्वलाई सशक्त बनाउन मतदातासँग आग्रह गरिन्।

कार्यक्रममा नेकपा एमालेका नेता, जनप्रतिनिधि तथा स्थानीय बासिन्दाको उल्लेखनीय उपस्थिति रहेको थियो।